ޚަބަރު
އިސްރާއީލު ޕާސްޕޯޓުގައި ރާއްޖެއަށް އެތެރެވުން މަނާކޮށް އިމިގްރޭޝަނުން އެޑްވައިޒަރީއެއް އާންމުކޮށްފި
ރާއްޖެއަންނަ ބައެއް ފަތުރުވެރިން އިމިގްރޭޝަން ކިއުގައި ފޮޓޯ: އިންޑިޕެންޑަންޓް
އިސްރާއީލުގެ ޕާސްޕޯޓުގައި ރާއްޖެއަށް އެތެރެވުން މަނާކުރުމާ ގުޅިގެން މޯލްޑިވްސް އިމިގްރޭޝަނުން ޓްރެވަލް އެޑްވައިޒަރީއެއް ނެރެ އެކަން ރަސްމީކޮށް އާންމުކޮށްފިއެވެ.
އިމިގްރޭޝަނުން ނެރުނު އެޑްވައިޒަރީގައިވާ ގޮތުން، 2025 ވަނަ އަހަރުގެ އެޕްރީލް މަހުގެ 15 ވަނަ ދުވަހުން ފެށިގެން އިސްރާއީލުގެ ޕާސްޕޯޓުގައި ދިވެހިރާއްޖެއަށް އެއްވެސް މީހަކު އައުމަކީ މަނާ ކަމެކެވެ. މި ނިންމުމަކީ އިމިގްރޭޝަންގެ ޤާނޫނަށް ރައްޔިތުންގެ މަޖިލީހުން ގެނައި އިޞްލާޙެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަސްދީޤުކުރެއްވުމާ ގުޅިގެން އަމަލުކުރަން ފަށާފައިވާ ނިންމުމެކެވެ.
Travel Advisory: Entry into Maldives Prohibited on Israeli Passports.
— Maldives Immigration (@ImmigrationMV) April 15, 2025
Read more: https://t.co/axLnVZbfhw pic.twitter.com/wPucd7qwPg
މި ނިންމުމާ ގުޅިގެން ބައިނަލްއަޤްވާމީ މީޑިއާތަކުގެ ސަމާލުކަން ވަނީ ރާއްޖެއަށް ހުއްޓިފައެވެ. މީގެ ތެރޭގައި އަލްޖަޒީރާ، ރަޝިޔާގެ އާރްޓީ ނިއުސް އަދި އެހެނިހެން ބޮޑެތި މީޑިއާތައް ހިމެނެއެވެ. އަދި ސޯޝަލް މީޑިއާގެ އެކި މަންސަތަކުގައިވެސް ގިނަ ފަރާތްތަކުން މިހާރު ދަނީ ފަލަސްޠީނުގެ ރައްޔިތުންގެ ޙައްޤުގައި ނިންމި ނިންމުން ފާހަގަކޮށް، ރައީސުލްޖުމްހޫރިއްޔާއަށާއި އެމަނިކުފާނުގެ ސަރުކާރަށް އަދި ދިވެހި ރައްޔިތުންނަށް ތަޢުރީފުގެ މެސެޖުތަކާއި ޝުޢޫރުތައް ފޮނުވަމުންނެވެ.
ރައީސުލްޖުމްހޫރިއްޔާ ވަނީ އިސްރާއީލުގެ ހައްދުފަހަނައަޅާފައިވާ ފައުޖުން ފަލަސްޠީނުގެ ނަސްލު ނައްތާލުމަށް ހިންގަމުންދާ ޤަތުލުޢާންމު ވަގުތުން ހުއްޓާލުމަށް ގޮވާލައްވާފައެވެ. އަދި ބައިނަލްއަޤްވާމީ އެކި މަންސަތަކުގައި މިކަމަށް ވަކާލާތު ކުރައްވަމުން ގެންދަވައެވެ. އެމަނިކުފާނު ވަނީ ރާއްޖެއިން އޮންނާނީ އަބަދުވެސް ފަލަސްޠީނާއެކު ކަމަށް ހާމަކުރައްވައި، އެކަމަށް އަޑުއުފުއްލަވާފައެވެ.
