ރައީސުލްޖުމްހޫރިއްޔާ ޓިކްޓޮކްގެ އިސް ވަފުދާ ބައްދަލުކުރައްވައި ޑިޖިޓަލައިޒޭޝަންގެ ވިޝަން ހިއްސާކުރައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޓިކްޓޮކްގެ އިސް ވަފުދަކާ ބައްދަލުކުރައްވައި، ރާއްޖޭގެ ޑިޖިޓަލައިޒޭޝަންގެ ވިޝަން ހިއްސާކުރައްވައިފިއެވެ. މި ބައްދަލުވުން ބޭއްވުނީ މިއަދު ރައީސް އޮފީހުގައެވެ.

ބައްދަލުވުމުގައި ރައީސް މުއިއްޒު، ރާއްޖޭގެ ޑިޖިޓަލައިޒޭޝަންގެ ވިޝަން ހިއްސާކުރެއްވިއިރު، ޓިކްޓޮކްގެ ޓީމުން އެ ވިޝަނަށް އެހީތެރިވެދެވިދާނެ ގޮތްތައް ފާހަގަކޮށްފައިވެއެވެ. ދެފަރާތުން ވަނީ މުސްތަޤުބަލުގައި އެއްބާރުލުން ދިނުމާމެދު އުއްމީދު ފާޅުކުރައްވާފައެވެ.

މި ބައްދަލުވުމުގެ އިތުރުން، ޓިކްޓޮކްގެ ވަފުދުން ވަނީ ސަރުކާރުގެ އެހެން ބައެއް މުއައްސަސާތަކާވެސް ބައްދަލުކުރައްވާފައެވެ. މިގޮތުން، ޕޮލިސް ކޮމިޝަނަރު އަލީ ޝުޖާއުއާއި ހޯމް މިނިސްޓްރީގެ ސްޓޭޓް މިނިސްޓަރު ޑރ. މުޙައްމަދު ކިނާނަތާ ބައްދަލުކުރައްވައި، ޓިކްޓޮކް ބޭނުންކުރުމުގައި ދިމާވާ ދަތިތަކާއި ސަލާމަތީ ކަންތައްތަކާ ގުޅޭގޮތުން މަޝްވަރާކުރައްވާފައިވެއެވެ.

President Dr @MMuizzu meets with TikTok’s senior delegation to discuss potential areas of collaboration. He shared his vision for digitalisation in the Maldives, while TikTok’s team highlighted how they can support that vision. Both sides expressed optimism for future… pic.twitter.com/mUuothbB5R

— The President's Office (@presidencymv) April 16, 2025

އިކޮނޮމިކް މިނިސްޓްރީގެ އިސް ބޭފުޅުންނާވެސް ބައްދަލުކުރައްވައި، ދިވެހީންނަށް ޓިކްޓޮކުން އާމްދަނީ ހޯދޭނެ މަގުތައް ތަނަވަސްކުރުމާ ގުޅޭގޮތުން މަޝްވަރާކުރައްވާފައިވެއެވެ. އިކޮނޮމިކް މިނިސްޓްރީން ބުނެފައިވަނީ، ރާއްޖެއަށް ޓިކްޓޮކްގެ އިތުރު ޚިދުމަތްތައް ތަޢާރަފުކުރުމަށް، ކަމާ ގުޅޭ އެކި ފަރާތްތަކާއެކު މުހިންމު މަޝްވަރާ ބައްދަލުވުންތައް ބާއްވާނެ ކަމަށެވެ.

ރައީސް މުޢިއްޒުގެ ރިޔާސީ ވައުދުފުޅެއްގެ ގޮތުގައި، ސޯޝަލް މީޑިއާ ޕްލެޓްފޯމްތަކުން ދިވެހީންނަށް އާމްދަނީ ހޯދުމުގެ ފުރުސަތު ފަހިކޮށްދިނުން ހިމެނެއެވެ. މި ބައްދަލުވުންތަކަކީ އެ ވައުދުފުޅު ފުއްދުމަށް އެޅޭ މުހިންމު ފިޔަވަޅެކެވެ.