ވެލާނާ އެއާޕޯޓުގެ 59 ވަނަ އަހަރީ ދުވަސް ފާހަގަކުރުމަށް ހާއްސަ ހަރަކާތްތަކެއް ފަށައިފި

ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ 59 ވަނަ އަހަރީ ދުވަސް ފާހަގަކުރުމަށް ހާއްސަ ހަރަކާތްތަކެއް، އެއާޕޯޓު ހިންގަމުން އަންނަ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން މިއަދު ފަށައިފި އެވެ.

މި ހަރަކާތްތައް ފެށިފައިވަނީ މިއަދު ހެނދުނު ވީއައިއޭގައި ކުރިއަށް ގެންދިޔަ ދިދަ ނެގުމުގެ ރަސްމިއްޔާތަކުންނެވެ. މި ރަސްމިއްޔާތުގައި އެމްއޭސީއެލްގެ އިސްވެރިންނާއި މުވައްޒަފުންގެ އިތުރުން ސްޓޭކްހޯލްޑަރުން ބައިވެރިވެފައިވެއެވެ.

އެމްއޭސީއެލްއިން މި ދުވަހުގެ މުނާސަބަތުގައި 59 ފޫޓުގެ ކޭކެއް ފަޅާލުމުގެ އިތުރުން، އެކުވެރިކަމުގެ ހިނގާލުމެއްވެސް ކުރިއަށް ގެންގޮސްފައިވެއެވެ.

This morning, we marked the 59th anniversary of @VelanaAirport with a flag hoisting ceremony, a unity walk, and a cake cutting — celebrating nearly six decades of connection and shared milestones! ✈️ pic.twitter.com/ffBTeBeBsa

— Maldives Airports Company Ltd (@MACLmedia) April 12, 2025

މިއަދު ހެނދުނު ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް ވިދާޅުވީ ކުރިއަށް އޮތް އަހަރަކީ ތަރައްގީގެ ގޮތުން އެތައް ކުރިއެރުންތަކެއް ވީއައިއޭއަށް ލިބޭނެ އަހަރެއް ކަމަށެވެ. އަދި ކުންފުނިތަކާ ހަވާލުކޮށްގެން ކުރެވޭ މަސައްކަތްތަކުން ނިންމާނީ ހަމައެކަނި ފެސިލިޓީތައް ކަމަށާއި، އެތަންތަން ހިންގައި ގައުމަށް އޭގެ ފައިދާ ހޯދައިދެނީ މުވައްޒަފުންގެ ބުރަ މަސައްކަތުންކަން ފާހަގަކުރެއްވިއެވެ.

މީގެ އިތުރުން ޝަރީފް ވިދާޅުވީ އެއާޕޯޓުގެ ތަރައްގީއަށް ރައީސުލްޖުމްހޫރިއްޔާ ޑރ. މުޢިއްޒު އިސްކަން ދެއްވާކަން ފާހަގަކުރައްވައި އެމަނިކުފާނަށް ޝުކުރު ދަންނަވާ ކަމަށެވެ.

އެއާޕޯޓަށް 59 އަހަރު ފުރުމުގެ މުނާސަބަތުގައި މުވައްޒަފުންނަށް ހާއްސަ ގާލާ ނައިޓަކާއި، ވަންޑޭ ހޭންޑްބޯލް ކަޕެއް ކުރިއަށް ގެންދިއުމަށް އެމްއޭސީއެލްއިން ވަނީ ނިންމާފައެވެ.