ޤައުމީ ކުތުބުޚާނާގެ ފޮތް ކަލެކްޝަން މުއްސަނދިކުރުމަށް "ފޮތް ހަދިޔާކުރުމުގެ ކެމްޕެއިން" އެއް

ޤައުމީ ކުތުބުޚާނާއާއި ކުޑަކުދިންގެ މަލްޓިމީޑިއާ ލައިބްރަރީގެ ފޮތް ކަލެކްޝަން އިތުރަށް ތަރައްޤީކޮށް މުއްސަނދިކުރުމަށްޓަކައި، އާންމުންނަށް ހުޅުވާލައިގެން ކުރިއަށްގެންދާ ޚާއްޞަ ފޮތް ހަދިޔާކުރުމުގެ ކެމްޕެއިނެއް ފެށުމަށް ނިންމައިފިއެވެ.

ޤައުމީ ކުތުބުޚާނާއިން މަޢުލޫމާތު ދޭ ގޮތުގައި، މި ކެމްޕެއިނުގެ މައިގަނޑު މަޤޞަދަކީ ކުތުބުޚާނާގެ ފޮތްތަކާއި ވަސީލަތްތައް އިތުރުކޮށް، ކިޔުންތެރިންނަށް ބޭނުންވާ ތަފާތު ދާއިރާތަކުގެ ފޮތްތައް ފަސޭހަކަމާއެކު ލިބޭނެ އިންތިޒާމު ހަމަޖެއްސުމެވެ. ވަކިން ޚާއްޞަކޮށް، ކުޑަކުދިންގެ މަލްޓިމީޑިއާ ލައިބްރަރީއަށް ބޭނުންވާ ފޮތްތަކާއި ތަޢުލީމީ ވަސީލަތްތައް ހޯދުމަށް މި ކެމްޕެއިނުގެ ދަށުން ބޮޑު އިސްކަމެއް ދެވޭނެއެވެ.

މި ކެމްޕެއިން ކުރިއަށް ދިއުމަށް ހަމަޖެހިފައިވަނީ 2026 ވަނަ އަހަރުގެ ޖުލައި މަހުގެ 1 ވަނަ ދުވަހުން ފެށިގެން އެ މަހުގެ 31 ވަނަ ދުވަހުގެ ނިޔަލަށެވެ. ފޮތް ހަދިޔާ ކުރަން ބޭނުންވާ ފަރާތްތަކަށް ކޮންމެ ދުވަހަކު ހެނދުނު 09:30 އިން ހަވީރު 17:30 އާ ދެމެދު ޤައުމީ ކުތުބުޚާނާއަށް ވަޑައިގެން ފޮތް ހަދިޔާ ކުރެއްވޭނެއެވެ.

މިއީ ޢިލްމީ މުޖުތަމަޢެއް ބިނާކުރުމަށާއި، އަންނަން އޮތް ޖީލުތަކަށް ފޮތްތެރިކަމުގެ މުހިންމުކަން އަންގައިދިނުމަށް ކުރެވޭ ވަރަށް މުހިންމު މަސައްކަތެކެވެ.

މި ކެމްޕެއިނާ ގުޅޭގޮތުން އިތުރު މަޢުލޫމާތު ސާފުކުރައްވަން ބޭނުންފުޅުވާ ފަރާތްތަކުން 3007200 ނަންބަރު ފޯނާ ގުޅުއްވުމަށް ޤައުމީ ކުތުބުޚާނާއިން އިރުޝާދު ދެއެވެ.