މާލީ ވަޒީރަކަށް ޒަރީރު އައްޔަންކުރުމަށް ރުހުން ދީފި

މިނިސްޓަރ އޮފް ފައިނޭންސްގެ މަޤާމަށް ޙަސަން ޒަރީރު އައްޔަންކުރުމަށް ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން މިއަދު ރުހުން ދީފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރުގެ މަޤާމަށް ޙަސަން ޒަރީރު އައްޔަންކުރެއްވީ މި ހިނގާ ޖޫން މަހުގެ 8 ވަނަ ދުވަހުއެވެ. މި އައްޔަންކުރެއްވުމާ ގުޅިގެން، ޤާނޫނުއަސާސީގައިވާ ގޮތުގެ މަތިން ވަޒީރަށް މަޖިލީހުގެ ރުހުން ހޯދުމަށް ރައީސުލްޖުމްހޫރިއްޔާ ވަނީ މަޖިލީހަށް ހުށަހަޅުއްވާފައެވެ.

ކޮމިޓީ މަރުޙަލާގައި މި މައްސަލަ ދިރާސާކުރުމަށްފަހު، ބައްދަލުވުމުގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާޤުން ނިންމާފައިވަނީ ޒަރީރަކީ އެ މަޤާމަށް ޝަރުޠު ހަމަވާ ބޭފުޅެއް ކަމަށާއި، އޭނާއަށް ރުހުން ދިނުމަށް ފެންނަ ކަމަށެވެ. މީގެ އިތުރުން، ވުޒާރާތަކުގެ އޮނިގަނޑަށް ރައީސް ގެންނެވި ބަދަލުތަކަށް ރުހުން ދިނުމަށްވެސް ކޮމިޓީން ވަނީ ފާސްކޮށްފައެވެ.

ޙަސަން ޒަރީރަކީ މީގެ ކުރިން މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމާއި ޑެޕިއުޓީ ކޮމިޝަނަރ ޖެނެރަލްގެ މަޤާމު ފުރުއްވާފައިވާ، މާލީ ދާއިރާގެ ތަޖުރިބާކާރު ބޭފުޅެކެވެ. އޭނާ ވަނީ މެލޭޝިޔާގެ އިންޓަރނޭޝަނަލް އިސްލާމިކް ޔުނިވަރސިޓީން އެކައުންޓިންގ ދާއިރާއިން ބެޗްލަރސް ޑިގްރީ އަދި ފިނޭންސް ދާއިރާއިން މާސްޓަރސް ޑިގްރީ ހާސިލްކުރައްވާފައެވެ.

ޤާނޫނީ ގޮތުން ބަލާއިރު، ވަޒީރަކަށް ފުރިހަމަ ބާރުވެރިކަން ލިބިވަޑައިގަންނަވަނީ ރައްޔިތުންގެ މަޖިލީހުގެ ތަޅުމުން ރުހުން ދިނުމުންނެވެ. އެހެންކަމުން، ކޮމިޓީގެ މި ނިންމުމާއެކު ދެން އޮންނާނީ މަޖިލީހުގެ ޖަލްސާއެއްގައި މި މައްސަލައަށް ވޯޓަށް އެހުމެވެ.

މި ސަރުކާރުގެ މާލީ ސިޔާސަތުތައް ތަންފީޒުކުރުމުގައި އިސްދައުރެއް އަދާކުރައްވާނެ ޒަރީރުގެ ނަންފުޅު މަޖިލީހަށް ހުށަހަޅާފައިވާއިރު، މަޖިލީހުގެ ރައީސް ޢަބްދުއްރަޙީމް ޢަބްދުﷲ އިސްކޮށް ހުންނަވައިގެން ކުރިއަށްގެންދާ މި ދައުރުގައި، ސަރުކާރަށް ބޭނުންވާ ޤާނޫނީ ރުހުން ހޯދުމުގެ މަސައްކަތްތައް ދަނީ ބާރުސްޕީޑުގައި ކުރިއަށެވެ.