ސޯޝަލް މީޑިއާގެ ޒަރީއާއިން ތަމަޅަ ސިޔާސީ މައިދާނަށް ވިޖޭ ގެނައި އިންގިލާބީ ބަދަލު

އިންޑިއާގެ ދެކުނުގެ ސްޓޭޓެއް ކަމަށްވާ ޓެމިލްނާޑޫގެ ސިޔާސީ މަސްރަހަށް  އައި އެންމެ ބޮޑު ބަދަލަކީ، ފިލްމީ ތަރި ޗަންދުރަޝޭކަރު ޖޯސެފް ވިޖޭ ނުވަތަ އާންމު ނަމުން ނަމަ "ތަލަޕަތީ" ވިޖޭ، ފިލްމީ ދާއިރާ ދޫކޮށް ސިޔާސީ މައިދާނަށް ނުކުމެ ހޯދި ތާރީޚީ ކާމިޔާބީއެވެ. މި ކާމިޔާބީގެ އެންމެ ބޮޑު ސިއްރަކީ ސޯޝަލް މީޑިއާގެ ވަސީލަތްތައް ބޭނުންކޮށްގެން އޭނާ ހިންގި ވަރުގަދަ ކެމްޕޭނެވެ.

ވިޖޭ އަލަށް އުފެއްދި ސިޔާސީ ޕާޓީ، "ޓެމިލަގަ ވެޓްރީ ކަޒަގަމް" (ޓީވީކޭ) އިން ވަނީ ޓެމިލްނާޑޫގެ އެސެމްބްލީ އިންތިޚާބުގައި ސިޔާސީ މުހައްލިލުން ހައިރާންކޮށްލުމަށްފަހު ބޮޑު ކުރިއެރުމެއް ހޯދާފައެވެ. އެގޮތުން، 234 ގޮނޑި ހިމެނޭ އެސެމްބްލީގެ 108 ގޮނޑި އެ ޕާޓީން ވަނީ ކާމިޔާބުކޮށްފައެވެ. މިއީ ސާފު އަޣުލަބިއްޔަތަކަށްވުރެ ކުޑަ ތަންކޮޅެއް މަދު އަދަދެއް ނަމަވެސް، އައު ޕާޓީއަކުން މިހާ ގިނަ ގޮނޑި ކާމިޔާބު ކުރުމަކީ އާދަޔާޚިލާފު ކަމެކެވެ.

މި އިންތިޚާބުގައި ފެނިގެންދިޔަ އެންމެ ފާހަގަކޮށްލެވޭ އެއް ކާމިޔާބީއަކީ މަދުރާއީ ސެންޓްރަލް ދާއިރާއަށް ވާދަކުރި، މަސް ފިހާރައެއް ހިންގާ މަޒްހަރު ބަދުރުއްދީންގެ ކާމިޔާބީއެވެ. ސިޔާސީ ގޮތުން މާ ބޮޑު މަގުބޫލުކަމެއް ނެތް މަޒްހަރު، ބޮޑެތި ޕާޓީތަކުގެ ތަޖުރިބާކާރު ކެންޑިޑޭޓުން ބަލިކުރީ އެއްވެސް ބޮޑު ރެލީއެއް ނުބާއްވައެވެ. އޭނާގެ މި ކާމިޔާބީ ނިސްބަތްކުރީ ވިޖޭގެ ލީޑަރޝިޕަށާއި ޕާޓީގެ ރަމްޒެއްގެ ގޮތުގައި ބޭނުންކުރި "ވިސިލް" އަށެވެ.

ސިޔާސީ މުހައްލިލުން ބުނާ ގޮތުގައި، ވިޖޭގެ ކާމިޔާބީގެ އަސްލަކީ ބޭއްވި ޖަލްސާތަކެއް ނޫނެވެ. އެއީ ޑިޖިޓަލް މައިދާނުގައި އުފެއްދި ބާރުގަދަ ރާޅެވެ. ޔޫޓިއުބް، އިންސްޓަގްރާމް، ފޭސްބުކް އަދި ވަޓްސްއަޕް މެދުވެރިކޮށް އޭނާގެ ސަޕޯޓަރުން ވަނީ ވަރަށް ރޭވުންތެރިކަމާއެކު ކެމްޕޭން ކޮށްފައެވެ. ވިޖޭ ދެއްވާ ތަގުރީރުތަކުގެ ކުރު ކްލިޕްތައް އުފައްދައި، މަދު ގަޑިއިރުތަކެއްގެ ތެރޭގައި މިލިއަނުން މީހުންނަށް ފޯރުކޮށްދިނެވެ.

މި ޑިޖިޓަލް ކެމްޕޭންގެ ފަހަތުގައި އޮތް އެންމެ ބޮޑު ބާރަކީ ފާއިތުވި 30 އަހަރު ދުވަހުގެ ތެރޭގައި ވިޖޭ ބިނާކުރި ފޭން ކުލަބުތަކެވެ. ގާތްގަނޑަކަށް 85,000 ފޭން ކުލަބު ހިމެނޭ މި ނެޓްވޯކް، ސިޔާސީ މެސެޖުތައް ފަތުރާ ވަރުގަދަ މެޝިނަކަށް ބަދަލުވިއެވެ. އިދިކޮޅު ފަރާތްތަކުން ދައްކާ ވާހަކަތަކަށް ވަގުތުން ރައްދުދީ، ޕާޓީގެ މެސެޖުތައް ރައްޔިތުންގެ ގާތަށް ފޯރުކޮށްދިނުމުގައި މި ކުލަބުތަކުން އަދާކުރީ މުހިންމު ދައުރެކެވެ.

އިންޑިއާގެ ސަގާފީ ކެމްޕޭންތަކާ ޚިލާފަށް، ވިޖޭ އާންމުންގެ ތެރެއަށް ނުކުމެ އުޅުނީ ވަރަށް މަދުންނެވެ. އޭގެ ބަދަލުގައި އޭނާ އިޚްތިޔާރުކުރީ ޑިޖިޓަލް ޕްލެޓްފޯމްތައް މެދުވެރިކޮށް ސީދާ ރައްޔިތުންނާ މުއާމަލާތް ކުރުމަށެވެ. މިއީ ޒުވާނުންނާއި އަންހެނުންގެ މެދުގައި ވަރަށް ބޮޑު ތަރުހީބެއް ލިބުނު އުކުޅެކެވެ. ނަމަވެސް، ބައެއް މުހައްލިލުން ފާހަގަކުރާ ގޮތުގައި މި ކާމިޔާބީ ދެމެހެއްޓުމަށްޓަކައި، ދެން ޖެހޭނީ އަމަލީ ގޮތުން ރަށު ފެންވަރުގައި ޕާޓީގެ ހިންގުން ވަރުގަދަކޮށް، ވެރިކަން ހިންގުމުގެ ގާބިލްކަން ސާބިތުކޮށްދޭށެވެ.

ވިޖޭގެ އިދާރީ ތަޖުރިބާ ނެތުމާ މެދު ސުވާލު އުފެދުނު ނަމަވެސް، އޭނާގެ ސަޕޯޓަރުން ގަބޫލުކުރަނީ އޭނާއަކީ ގާއިމުވެފައިވާ ކޮރަޕްޓް ސިޔާސީ ނިޒާމު ބަދަލުކުރާނެ "އައުޓްސައިޑަރެއް" ކަމަށެވެ. މަޒްހަރު ބަދުރުއްދީން ފާހަގަކުރި ފަދައިން، ޕާޓީގެ މަގުސަދަކީ ރައްޔިތުން އިތުބާރުކުރާ ލީޑަރެއްގެ ދަށުން "ސާފު ވެރިކަމެއް" ގާއިމުކުރުމެވެ. މިއީ ޓެމިލްނާޑޫގެ ސިޔާސީ ތާރީޚުގައި ޑިޖިޓަލް މީޑިއާގެ ބޭނުން ހިފައިގެން ގެނައި އެންމެ ބޮޑު އެއް ބަދަލެވެ.