ދުންފުހުގެ ސަބަބުން މިއަދު ރާއްޖޭގެ އުތުރާއި ދެކުނުގެ ހިސާބުތަކަށް ވައި ނުސާފުވާނެ: މެޓް

ދުންފުހުގެ ސަބަބުން މިއަދު ރާއްޖޭގެ އުތުރާއި ދެކުނުގެ ހިސާބުތަކަށް ވައި ނުސާފުވާނެކަމަށް މޫސުމާ ބެހޭ ޤައުމީ އިދާރާ، މެޓް އިން ވިދާޅުވެއްޖެއެވެ.

މޫސުމާ ބެހޭ ޤައުމީ އިދާރާއިން ވިދާޅުވީ، ދުންފުހުގެ އަސަރު މިއަދު ރާއްޖޭގެ އުތުރާއި ދެކުނުގެ ހިސާބުތަކަށް ކުރަމުންދާއިރު، މޫސުމާ ބެހޭ ރިޕޯޓުތަކުގައި ދުރުފެންނަ މިންވަރު 3 ކިލޯމީޓަރަށް ވުރެ ދަށުން ރިޕޯޓުކުރަމުންދާ ކަމަށެވެ. ހަމަ އެހެންމެ، ކުރިއަށް އޮތް 4 ދުވަހުވެސް އިރުއުތުރުން އަންނަ ވަޔާއެކު، ދުންފުހުގެ އަސަރު ރާއްޖެމަތީގައި ހުންނާނެކަމަށް ބެލެވޭކަމަށް އެ އިދާރާއިން ވަނީ ވިދާޅުވެފައެވެ.

Air quality in the northern and central regions has deteriorated to unhealthy levels and is expected to persist over the next 4 days.
Seafarers and those spending extended time outdoors are advised to take necessary precautions and follow the guidelines provided by the @HPA_MV. pic.twitter.com/UiTnkqH3Jw

— Maldives Meteorology (@MetMaldives) February 9, 2026

މި ހާލަތާ ގުޅިގެން ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން މަޑުޖައްސާލުމަށް ކަމާ ބެހޭ އިދާރާތަކުން ވަނީ އިލްތިމާސްކޮށްފައެވެ. އަދި ބޭރަށް ނުކުންނަ ވަގުތުތަކުގައި މާސްކު އެޅުމަށާއި، ބޭރުގެ ނުސާފު ވައި ނުވަންނާނެހެން ގޭގެ ދޮރުތައް ލައްޕާފައި ބެހެއްޓުމަށް އެޗްޕީއޭއިން އިރުޝާދު ދެއެވެ. މީގެ އިތުރުން ގޭތެރޭގައި އެއަރ ޕިއުރިފަޔަރ ބޭނުންކުރުމަކީ ވެސް ކުރެވިދާނެ ކަމެއް ކަމަށް އެ އިދާރާއިން ވިދާޅުވެއެވެ.

މި ދުވަސްވަރު ވައިގެ ހާލަތަށް ބަލައިގެން ޢާންމު ދިރިއުޅުމުގެ ކަންކަން ބައްޓަންކުރުމަކީ މުހިންމު ކަމެއްކަމަށް ހެލްތު ޕްރޮޓެކްޝަން އެޖެންސީން ފާހަގަކުރެއެވެ.