އައްޑޫގައި ކެތުލެބާއި،ފުރަތަމަ ފަހަރަށް ސަރުކާރުގެ އައިނު ފިހާރައެއް ހުޅުވައިފި

އައްޑޫ ސިޓީގައި ސަރުކާރުން ޤާއިމުކުރި އައިނު ފިހާރައާއި ކެތު ލެބް ރަސްމީކޮށް ހުޅުވައިފިއެވެ. މިއީ އަތޮޅުތެރޭގައި މިފަދަ ޚިދުމަތްތަކެއް ޤާއިމުކުރި ފުރަތަމަ ފަހަރެވެ.

އައްޑޫ އެކުއެޓޯރިއަލް ހޮސްޕިޓަލް (އޭއީއެޗް) ގައި ބޭއްވި ޚާއްޞަ ރަސްމިއްޔާތެއްގައި މި ޚިދުމަތްތައް އިފްތިތާޙްކޮށްދެއްވީ ޞިއްޙީ ވަޒީރު ޢަބްދުﷲ ނާޒިމް އިބްރާހީމެވެ. މި ރަސްމިއްޔާތުގައި މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖީއެޗް) ގެ ސީއީއޯ އިބްރާހީމް ޢަބްދުއްރައްޒާޤް ޙަލީމްއާއި، އައްޑޫ އެކުއެޓޯރިއަލް ހޮސްޕިޓަލްގެ ސީއީއޯ ޑރ. އިބްރާހިމް ޔާސިރް އަހުމަދު ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ވާހަކަދައްކަވަމުން އެމްސީޖީއެޗްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، އައްޑޫގައި ޤާއިމުކުރި ކެތު ލެބްގެ ސަބަބުން އައްޑޫ ސިޓީގެ އިތުރުން މުޅި ދެކުނުގެ އަތޮޅުތަކުގެ ރައްޔިތުން ހިތުގެ ބަލިތަކަށް ފަރުވާ ހޯދުމަށް މާލެއަށް ބަރޯސާވާ މިންވަރު ވަރަށް ބޮޑަށް ކުޑަވެގެންދާނެ ކަމަށެވެ.

Minister of Health @ANazim2019 launched Cath Lab services at Addu Equatorial Hospital, making it the first such facility established outside the capital city of Malé. pic.twitter.com/wm1VvCVW7p

— Ministry of Health (@MoHmv) February 8, 2026

އޭނާ އިތުރަށް ވިދާޅުވީ، އޭއީއެޗްގައި ނެހެދޭ ބައެއް ޓެސްޓުތަކަށް އާންމުންގެ އަތުން ނަގަމުންދާ ކޯ-ޕޭމަންޓަށް ދާއިމީ ހައްލެއް ގެނައުމުގެ މަސައްކަތް ފަށާފައިވާ ކަމަށެވެ. އެގޮތުން، ޕްރައިވެޓް ލެބޯޓަރީތަކުގެ ބަދަލުގައި އެފަދަ ޓެސްޓުތައް އައިޖީއެމްއެޗްއަށް ފޮނުވައިގެން ހެދޭނެ އިންތިޒާމުތައް ވަރަށް އަވަހަށް ހަމަޖެހިގެންދާނެ ކަމަށް އޭނާ ފާހަގަކުރެއްވިއެވެ.

އައްޑޫގައި ހުޅުވި އައިނު ފިހާރައާ ގުޅޭގޮތުން ޙަލީމް ވިދާޅުވީ، މިއީ އެމްސީޖީއެޗްއާއި އޭއީއެޗް ގުޅިގެން ކުރެވުނު މުހިންމު މަސައްކަތެއް ކަމަށެވެ. މާލޭގައި ހިންގާ ސަރުކާރުގެ އައިނު ފިހާރަތަކުގެ ކާމިޔާބީއަށް އަލިއަޅުއްވާލައްވަމުން އޭނާ ވިދާޅުވީ، އެމްސީޖީއެޗް އޮޕްޓިކަލްސްއިން މިހާތަނަށް 12,988 ފަރާތަކަށް ޚިދުމަތް ދީފައިވާ ކަމަށާއި، އޭގެ ތެރެއިން 12,056 ފަރާތަކަށް ސަރުކާރުގެ ޚަރަދުގައި އައިނު ހަދައިދީފައިވާ ކަމަށެވެ.

މި ރަސްމިއްޔާތުގެ ތެރެއިން، ކެތު ލެބްގެ މަސައްކަތްތައް ހިންގުމާއި އައިނު ފިހާރައިގެ ކަންކަން ބެލެހެއްޓުމާ ގުޅޭގޮތުން އައިޖީއެމްއެޗްއާއި އައްޑޫ އެކުއެޓޯރިއަލް ހޮސްޕިޓަލާ ދެމެދު ވަނީ ރަސްމީ އެއްބަސްވުމެއްގައި ސޮއިކޮށްފައެވެ