މުސްލިމް ބްރަދަރހުޑު ޓެރަރިސްޓު ޖަމާއަތެއްގެ ގޮތުގައި ކަނޑައެޅުމަށް ދިރާސާކުރަނީ

އެމެރިކާގެ ރައީސް ޑޮނަލްޑް ޓްރަމްޕް، މުސްލިމް ބްރަދަރހުޑުގެ އެކި ގޮފިތައް ބައިނަލްއަޤްވާމީ ޓެރަރިސްޓު ޖަމާއަތްތަކުގެ ގޮތުގައި ކަނޑައެޅުމާ ބެހޭ ގޮތުން ރަސްމީ ދިރާސާއެއް ހިންގުމަށް އަމުރުކުރައްވައިފިއެވެ. މި ނިންމުމުގެ ސަބަބުން މެދުއިރުމަތީގެ އެންމެ ނުފޫޒުގަދަ އިސްލާމީ ހަރަކާތްތަކުގެ ތެރޭގައި ހިމެނޭ މި ޖަމާއަތުގެ މައްޗަށް ދަތިކުރުމުގެ ފިޔަވަޅުތަކެއް އަޅާފާނެ ކަމަށް ބެލެވެއެވެ.

ރައީސް ޓްރަމްޕް މިކަމަށް ބާރުއަޅުއްވައި ސޮއިކުރެއްވި އެގްޒެކެޓިވް އޯޑަރުގައި، ޚާރިޖީ ވަޒީރު މާކޯ ރޫބިއޯއާއި ޓްރެޝަރީ ސެކްރެޓަރީ ސްކޮޓް ބެސެންޓަށް ވަނީ މިޞްރު، ލުބްނާން އަދި އުރުދުން ފަދަ ޤައުމުތަކުގައި ހަރަކާތްތެރިވާ ބްރަދަރހުޑުގެ ގޮފިތައް ދިރާސާކުރުމަށް އަންގަވާފައެވެ. މިގޮތުން ދިރާސާކޮށް އެފަދަ ޖަމާއަތްތައް ކަނޑައަޅައިފިނަމަ، 45 ދުވަހުގެ ތެރޭގައި ސަރުކާރުން އެކަމާ ގުޅިގެން ފިޔަވަޅު އަޅަންޖެހޭނެއެވެ.

ވައިޓްހައުސްއިން ބުނާ ގޮތުގައި، އެމެރިކާއިން ދެކޭ ގޮތުގައި މި ހަރަކާތުގެ ބައެއް ފެކްޝަންތަކުން އިޒްރޭލާއި އެމެރިކާގެ އެކުވެރި ޤައުމުތަކާ ދެކޮޅަށް ހަމަލާތަކަށް ތާއީދުކޮށް ނުވަތަ ހިތްވަރުދެއެވެ. އެމެރިކާގެ އޮފިޝަލުން މީގެ އިތުރުން ތުހުމަތުކުރަނީ، މުސްލިމް ބްރަދަރހުޑުން ހަމާސްއަށް އެހީތެރިކަން ފޯރުކޮށްދޭ ކަމަށާއި، މި ބޮޑު ނެޓްވޯކް ސަރަޙައްދީ ހަމަނުޖެހުންތައް އިތުރުކުރުމުގައި ބައިވެރިވެފައިވާ ކަމަށެވެ.

ރިޕަބްލިކަން ލީޑަރުންނާއި ކޮންސަވޭޓިވް ގްރޫޕްތަކުން ވަނީ މިފަދަ ފިޔަވަޅެއް އެޅުމަށް ގިނަ އަހަރުތަކެއް ވަންދެން މަސައްކަތްކޮށްފައެވެ. ރައީސް ޓްރަމްޕް އެމަނިކުފާނުގެ ފުރަތަމަ ދައުރުގައި ވެސް މިފަދަ މަސައްކަތެއް ކުރައްވަން މަސައްކަތްކުރެއްވި ނަމަވެސް، ދެވަނަ ދައުރު ފެއްޓެވުމަށްފަހު މި މަސައްކަތް އަލުން ފަށާފައި ވެއެވެ. މިކަމަށް ހުރި ޕްރެޝަރު އިތުރުވީ މިދިޔަ ހަފުތާގައި ޓެކްސަސްގެ ގަވަރުނަރު ގްރެގް އެބޮޓް، މި ޖަމާއަތް ދައުލަތުގެ ފެންވަރުގައި ޓެރަރިސްޓު ޖަމާއަތެއްގެ ގޮތުގައި ކަނޑައެޅުމަށްފަހުގައެވެ.

މުސްލިމް ބްރަދަރހުޑު އުފެއްދީ 1920ގެ އަހަރުތަކުގައި މިޞްރުގައެވެ. އެއީ އިސްލާމީ އަދި ސިޔާސީ ހަރަކާތެއްގެ ގޮތުގައި، އޭރު އިތުރުވަމުންދިޔަ ސެކިއުލަރ އަދި ގައުމިއްޔަތަށް ވަކާލާތުކުރާ ހަރަކާތްތަކަށް ރައްދެއްގެ ގޮތުގައެވެ. މި ޖަމާއަތް މެދުއިރުމަތީގެ އެކި ކަންކޮޅުތަކަށް ފުޅާވެ، ވަރުގަދަ ތާއީދެއް ހޯދާފައިވާ އިރު، ގިނަ ފަހަރު ވަނީ މަނާކޮށް އަދި ހަރުކަށި ފިޔަވަޅުތަކެއް އަޅާފައެވެ.