"ޖަޕާނަކީ އެމެރިކާގެ އެންމެގާތް އެކުވެރިޔާ ތަކައިޗީ ވަރުގެ ބޮޑުވަޒީރެއް ނުލިބޭނެ" ޓްރަމްޕް

އެމެރިކާގެ ރައީސް ޑޮނަލްޑް ޓްރަމްޕް، ޖަޕާނަށް ކުރައްވާ ދަތުރުފުޅެއްގައި، އެ ޤައުމުގެ އައު ބޮޑުވަޒީރު ސަނާއި ތަކައިޗީ އާ  ބައްދަލުކުރައްވައިފިއެވެ. ޓޯކިޔޯގައި ހުންނަ ބޮޑުވަޒީރުގެ ރަސްމީ ގޭގައި ބޭއްވެވި މި ބައްދަލުކުރެއްވުމުގައި، ޓްރަމްޕް ވަނީ ޖަޕާނަކީ އެމެރިކާގެ "އެންމެ ވަރުގަދަ އެއް އެކުވެރިޔާ" ކަމަށް ހާމަކުރައްވައި، ދެޤައުމުގެ ގުޅުން އިތުރަށް ވަރުގަދަކުރެއްވުމަށް ބޭނުންފުޅުވާކަން ހާމަކުރައްވާފައެވެ.

މުޅި އޭޝިއާ ސަރަޙައްދަށް ކުރައްވަމުން ގެންދަވާ ދަތުރުފުޅުގެ ތެރެއިން ޓްރަމްޕް ޖަޕާނަށް ވަޑައިގެންނެވިއިރު، ތަކައިޗީ މަޤާމާ ހަވާލުވެވަޑައިގަތްތާ ދުވަސްކޮޅެއް ނުވަނީސް މި ބައްދަލުކުރެއްވުން ބޭއްވުނެވެ. ދެ ލީޑަރުންވެސް މި ބައްދަލުވުން ސިފަކުރެއްވީ ޖަޕާނާއި އެމެރިކާގެ ގުޅުމުގައި ފެށުނު "އައު ރަންޒަމާނެއް" ކަމުގައެވެ.

"އަހަރެމެންނަކީ އެންމެ ވަރުގަދަ އެކުވެރިން، އަދި ތަކައިޗީއާ ބައްދަލުކުރެއްވުމަކީ ބޮޑު ޝަރަފެއް،" ރައީސް ޓްރަމްޕް ވިދާޅުވިއެވެ. އޭނާ ވަނީ ތަކައިޗީއަށް ތަޢުރީފުކުރައްވައި، "ޖަޕާނަށް ލިބިވަޑައިގަންނަވާނެ އެންމެ މޮޅު ބޮޑުވަޒީރަކަށް ތަކައިޗީ ވާނެ" ކަމަށް ވިދާޅުވެފައެވެ.

ބޮޑުވަޒީރު ތަކައިޗީވެސް ވަނީ މި ހިޔާލަށް ތާއީދުކުރައްވައި، ދެޤައުމުގެ ދެމެދުގައިވާ ގުޅުން އިތުރަށް ބަދަހިކުރެއްވުމަށް ބޭނުންފުޅުވާކަން ހާމަކުރައްވާފައެވެ. "އަޅުގަނޑު ބޭނުންވަނީ ޖަޕާނާއި އެމެރިކާގެ އެކުވެރިކަމުގެ އައު ރަންޒަމާނެއް ބިނާކުރަން. އެގުޅުމަކީ ދެޤައުމުވެސް އިތުރަށް ވަރުގަދަވެ، ފާގަތިވާނެ ގުޅުމަކަށް ވާނެ،" ތަކައިޗީ ވިދާޅުވިއެވެ. ވައިޓްހައުސްއިން މަޢުލޫމާތު ދޭ ގޮތުގައި، ގުޅުން ބަދަހިކުރުމުގެ ރަމްޒީ ހަރަކާތެއްގެ ގޮތުން، ޓްރަމްޕް ނޮބެލް ސުލްޙައިގެ އިނާމަށް ނޮމިނޭޓްކުރުމަށް ތަކައިޗީ ވަނީ ގަސްތުކުރައްވާފައެވެ.

މި ބައްދަލުކުރެއްވުމުގައި، ސެކިއުރިޓީއާއި ވިޔަފާރީގެ ދާއިރާއިން ދެޤައުމުގެ އެއްބާރުލުން އިތުރުކުރުމާ ބެހޭގޮތުން މަޝްވަރާކުރެވުނެވެ. މިގޮތުން، މުހިންމު މަޢުދަންތަކާއި ބޯޓުބަނުމުގެ  އައު އެއްބަސްވުންތަކުގައި ސޮއިކުރެވުނެވެ. މި އެއްބަސްވުންތަކުގެ މައިގަނޑު މަޤްސަދަކީ ސަޕްލައި ޗެއިންތަކުގެ ރައްކާތެރިކަން ކަށަވަރުކުރުމާއި، ޗައިނާއަށް ދެޤައުމު ބަރޯސާވާ މިންވަރު ކުޑަކުރުމެވެ.

ރައީސް ޓްރަމްޕް ޓޯކިޔޯއަށް ވަޑައިގެންނެވީ މެލޭޝިޔާ އާއި ދެކުނު ކޮރެއާ އަށް ކުރެއްވި ދަތުރުފުޅުތަކަށް ފަހުގައެވެ.