ޙޫޘީ ޢަސްކަރީ ވެރިޔާ އަދި 13 އަހަރުގެ ދަރިފުޅު އިސްރާއީލުން ދިން ހަމަލާއެއްގެ ޝަހީދުކޮށްލައިފި!

ޔަމަނުގެ ޙޫޘީ ހަރަކާތުން އެޖަމާޢަތުގެ ޢަސްކަރީ ވެރިޔާ މޭޖަރ ޖެނެރަލް މުޙައްމަދު އަލް-ޣަމާރީ ޝަހީދުވިކަން ކަށަވަރުކޮށްދީފިއެވެ. އިސްރާއީލުގެ ދުޝްމަނުންނާ ދެކޮޅަށް ހިންގި "ހަނގުރާމައެއްގައި" އޭނާ ޝަހީދުވީކަމަށް ޙޫޘީން ބުނެފައިވާއިރު، މިހަމަލާގައި އޭނާގެ 13 އަހަރުގެ ދަރިފުޅު ޙުސައިން ވެސް ޝަހީދުވެފައިވާކަމަށް ރިޕޯޓުތައް ބުނެއެވެ.

މިކަމާގުޅިގެން ޙޫޘީން ބަދަލުހިފުމަށް ހުވާކޮށް، އިސްރާއީލަށް "އެމީހުންހިންގާ ޖަރީމާތަކަށް ހިތުންނުފިލާ އަދަބެއް" ދެވޭނެކަމަށް ބުނެފައި ވެއެވެ. އިސްރާއީލުގެ ދިފާޢީ ވަޒީރު އިސްރާއީލް ކާތްޒް ވިދާޅުވީ، އަލް-ޣަމާރީ މަރުވީ އޮގަސްޓު މަހުގެ ފަހުކޮޅު ޞަންޢާގައި ދިން ހަމަލާއަކުން ލިބުނު ޒަޚަމްތަކަށްފަހު ކަމަށެވެ. އެ ހަމަލާގައި ޙޫޘީގެ ބޮޑުވަޒީރާއި އެހެނިހެން އިސް އޮފިޝަލުން ވެސް ޝަހީދުވެފައި ވެއެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ އަލް-ޣަމާރީއަށް އިޝާރާތް ކުރައްވައި، އޭނާއަކީ "އަހަރުމެންނަށް ގެއްލުން ދިނުމަށް މަސައްކަތްކުރި ޓެރަރިސްޓު ލީޑަރުންގެ ތެރެއިން ލީޑަރެއްގެ ގޮތުގައި އިތުރު ޓެރަރިސްޓު ލީޑަރެއް" ކަމަށް ސިފަ ކުރައްވާފައެވެ. އަދި މިފަދަ ނުރައްކާތަކަށް އަމާޒުކުރުން އިސްރާއީލުން ކުރިއަށްގެންދާނެކަމަށް އޭނާ ވަނީ ހުވާކުރައްވާފައެވެ.

އީރާނުގެ އެހީތެރިކަމާއެކު ޙޫޘީން ވަނީ ދިހަ އަހަރަށްވުރެ ގިނަ ދުވަހު ޔަމަނުގެ ހުޅަނގު އުތުރުގެ ބޮޑެތި ސަރަޙައްދުތަކެއްގެ ބާރު ފޯރުވައިފައެވެ. އެމީހުން ބައިނަލްއަޤްވާމީ ގޮތުން އެއްބަސްވެފައިވާ ސަރުކާރު ބާރުން ބޭރުކޮށް، ގިނަ ދުވަސްތަކެއްގެ ދިގު ހަނގުރާމައެއް ފަށާފައިވާއިރު، މިކަމުގެ ސަބަބުން އިންސާނީ ކާރިސާއެއް ވަނީ ކުރިމަތިވެފައެވެ.

2023 ވަނަ އަހަރުގެ އޮކްޓޯބަރު މަހު ޣައްޒާ ހަނގުރާމަ ފެށުނީއްސުރެން ޙޫޘީން ވަނީ އިސްރާއީލަށާއި ރަތް ކަނޑާއި ޢަދަން ކަނޑުގައިވާ ބައިނަލްއަޤްވާމީ ކަނޑުދަތުރުފަތުރުގެ މަގުތަކަށް ހަމަލާދީފައެވެ. މިކަންކަން ކުރަނީ ފަލަސްތީނު މީހުންނަށް ތާއީދު ކުރުމުގެ ގޮތުން ކަމަށް އެމީހުން ބުނެއެވެ. މިކަމުގެ ރައްދުގައި އެމެރިކާއާއި އިނގިރޭސިވިލާތުން ވެސް ވަނީ ޙޫޘީންގެ މަގާމުތަކަށް ހަމަލާދީފައެވެ.

ބުރާސްފަތި ދުވަހު ޙޫޘީން ނެރުނު ބަޔާނެއްގައި ބުނެފައި ވަނީ ފާއިތުވި ދެ އަހަރު ދުވަހުގެ ތެރޭގައި "ޖިނާއީ އެމެރިކާ-ޒަޔަނިސްޓު ހަމަލާތަކުގައި" ގިނަ ޢަދަދެއްގެ "ޝަހީދުން،  (ޢާންމު ރައްޔިތުންނާއި ޢަސްކަރީ މީހުން) ޝަހީދުވެފައިވާ" ކަމަށެވެ. އަލް-ޣަމާރީ ޝަހީދުވުމަކީ "ފަޚުރެއް" ކަމަށް އެބަޔާނުގައި ބުނެފައިވާއިރު، ބަދަލުހިފުމަށް ވެސް ވަނީ ހުވާކޮށްފައެވެ. "ދުޝްމަނުންނާ ދެކޮޅަށް ހިންގާ ހަނގުރާމައިގެ ބުރުތައް ނިމިފައެއް ނުވެއެވެ. އަދި ޒަޔަނިސްޓު ދުޝްމަނުންނަށް އެމީހުންގެ ޖަރީމާތަކަށް ހުއްދަނުވާ އަދަބެއް ކުރިމަތިވާނެ،" އެބަޔާނުގައި ވެއެވެ.