ކަރޫރު ރެލީގެ ހާދިސާއަކީ ޑީއެމްކޭގެ ކޮންސްޕިރަސީއެއް ކަމަށް ވިޖޭގެ ޕާޓީން ބުނެފި: 40 މީހުން މަރުވި މައްސަލަ ހައިކޯޓަށް

ޓެމިލްނާޑޫގެ ކަރޫރުގައި  ބޭއްވި ރެލީއެއްގައި  40 މީހުން މަރުވެ، 100 އަށް ވުރެ ގިނަ މީހުންނަށް އަނިޔާވި ހާދިސާގެ ފަހަތުގައި ވެރިކަންކުރާ ޑީއެމްކޭ ޕާޓީގެ ސިއްރު ރޭވުމެއް އޮތް ކަމަށް ތުހުމަތުކޮށް، ޓެމިލްނާޑޫގެ މަޝްހޫރު އެކްޓަރު-ސިޔާސީ ލީޑަރު ވިޖޭގެ ސިޔާސީ ޕާޓީ، ތަމިޅަގަ ވެތްރި ކަޅަގަމް (ޓީވީކޭ) އިން މައްސަލަ މާދުރައި ހައިކޯޓަށް ހުށަހަޅައިފިއެވެ.

ޓީވީކޭގެ ވަކީލު އަރިވަޅަގަން އެންޑީޓީވީއަށް ވިދާޅުވީ، މި މައްސަލަ ތަޙްޤީޤު ކުރުމަށް ޚާއްސަ ތަޙްޤީޤު ޓީމެއް (އެސްއައިޓީ) އެކުލަވާލުމަށް ނުވަތަ މަރުކަޒީ އެޖެންސީ ސީބީއައިއަށް މައްސަލަ ބަދަލުކުރުމަށް އެދި ހައިކޯޓަށް ދަޢުވާއެއް ހުށަހަޅާފައިވާ ކަމަށެވެ. އަރިވަޅަގަން ވަނީ ކަރޫރު ރެލީގައި ސަލާމަތީ އުޞޫލުތަކާ ޚިލާފުވެފައިވާ ކަމަށް ދައުލަތުން ކުރާ ތުހުމަތުތައް ދޮގުކުރައްވާފައެވެ.

ޓީވީކޭގެ ޤާނޫނީ ވިންގުގެ ސްޓޭޓް ކޯޑިނޭޓަރު އަރިވަޅަގަން ވިދާޅުވީ، އެމީހުން މަދުރައި ހައިކޯޓުގެ ބެންޗަށް މި މައްސަލަ މާދަމާ ހުށަހަޅާނެ ކަމަށެވެ. "ކަރޫރުގައި ހިނގި ހާދިސާއަކީ ކުށުގެ ކޮންސްޕިރަސީއެއް. އެހެންކަމުން ދައުލަތުގެ އެޖެންސީއަކުން ނޫން، މިނިވަންކޮށް މިކަން ތަޙްޤީޤުކޮށްދިނުމަށް އަޅުގަނޑުމެން ހައިކޯޓަށް އެދެން،" އޭނާ އެންޑީޓީވީއަށް ވިދާޅުވިއެވެ. "ކޯޓުން ޚާއްސަ ތަޙްޤީޤު ޓީމެއް އެކުލަވާލަން ޖެހޭނެ، ނުވަތަ މި މައްސަލަ ޓެމިލްނާޑޫ ފުލުހުންގެ އަތުން ސީބީއައިއަށް ބަދަލުކުރަން ޖެހޭނެ،" އޭނާ އިތުރަށް ވިދާޅުވިއެވެ.

ފުލުހުންގެ ތަޙްޤީޤަށް ޓީވީކޭއިން އިތުބާރު ނުކުރަނީތޯ ދެންނެވުމުން ވަކީލު ޖަވާބު ދެއްވީ، "މިއީ ކުށުގެ ކޮންސްޕިރަސީއެއް. އަޅުގަނޑުމެންނަށް މި މައުލޫމާތު ލިބުނީ އެ ސަރަހައްދުގެ މީހުންގެ އަތުން. އަދި ސީސީޓީވީ ފުޓޭޖުތަކެއް ވެސް އެބަހުރި. މި ފުޓޭޖުތަކުން ދައްކަނީ ކަރޫރު ޑިސްޓްރިކްޓްގައި ވެރިކަންކުރާ ޕާޓީގެ ބައެއް އިސްވެރިންގެ ކުށުގެ ކޮންސްޕިރަސީއެއް އޮތް ކަމަށް،" ކަމަށެވެ.

ރެލީގައި ފުލުހުން ކަނޑައަޅާފައިވާ ސަލާމަތީ އުޞޫލުތަކާ ޚިލާފުވެފައިވާ ކަމަށް ޑީއެމްކޭ ސަރުކާރުން ކުރާ ތުހުމަތުތަކަށް ރައްދު ދެއްވަމުން އަރިވަޅަގަން ވިދާޅުވީ، "ފުލުހުން ކަނޑައަޅާފައިވާ އެއްވެސް ޝަރުތަކާ އަޅުގަނޑުމެން ޚިލާފެއް ނުވަން." އޭނާ ވިދާޅުވީ، ޓީވީކޭއިން ފާއިތުވެދިޔަ ދެތިން މަސްދުވަހުގެ ތެރޭގައި މާދުރައި، ޓްރިޗީ، އަރިޔަލޫރު، ތިރުވަރޫރު، ނާގަޕައްޓިނަމް އަދި ނަމައްކަލްގައި ގިނަ ހަރަކާތްތަކެއް ބާއްވާފައިވާ ކަމަށެވެ. "މިކަން ކަރޫރުގައި މިހެންވީ ކީއްވެތޯ މިއީ ސުވާލާއި  ޝައްކު އުފައްދާ ކަމެއް،" އޭނާ ވިދާޅުވިއެވެ.

ޑީއެމްކޭއިން ވަނީ ކޮންސްޕިރަސީގެ ތުހުމަތުތަކަށް އެއްވެސް ކޮމެންޓެއް ކުރުމުން ވަކިވެގަނެފައެވެ. ޕާޓީގެ ތަރުޖަމާނު ޑރ. ސައްޔިދު ހަފީޒުﷲ އެންޑީޓީވީއަށް ވިދާޅުވީ، "އަޅުގަނޑުމެން މިކަން ސިޔާސީކުރާކަށް ބޭނުމެއް ނޫން. ޤާނޫނުގެ މަގުން ކަންކަން ކުރިއަށްދާނެ. މިފަދަ ތުހުމަތުތައް ކުރާ ފަރާތްތަކުން ފުރަތަމަ އަމިއްލަ ޕާޓީގެ އިސްވެރިންގެ އުޅުން ހުރިގޮތް މުރާޖާޢާކުރަން ޖެހޭނެ،" ކަމަށެވެ.

ދައުލަތުގެ މަސްދަރުތަކުން ބުނާގޮތުގައި، ކަރޫރު ރެލީ ބޭއްވި ތަނަށް މެންދުރުން ފެށިގެން މީހުން އެއްވެފައިވާ ކަމަށާއި ނަމަވެސް ވިޖޭ އެ ސަރަހައްދަށް އައީ ހަވީރު 7 ޖަހާކަންހާއިރު ކަމަށެވެ. އަދި 10,000 މީހުންގެ ޖާގަ ހުންނަ ތަނަކަށް 27,000 މީހުން އެއްވެފައިވާ ކަމަށް ވެސް އެ މަސްދަރުތަކުން ބުނެއެވެ. އެ މަސްދަރުތަކުން ވަނީ ވިޖޭ ލަސްވީ ޤަސްތުގައި ކަމަށާއި، އޭގެ މަޤްޞަދަކީ އެއްވެފައިވާ މީހުންގެ އަދަދު އިތުރުކުރުން ކަމަށް ތުހުމަތުކޮށްފައެވެ.

މި ތުހުމަތުތައް ދޮގުކުރައްވަމުން ޓީވީކޭގެ ވަކީލު ވިދާޅުވީ، "ލަސްވީ އަޅުގަނޑުމެންގެ ކުށަކުން ނޫން. ލަސްވީ ޓްރެފިކް ބޮޑުވެގެން. އެހެންވެ ގަޑިއަށް އެ ތަނަށް ނުދެވުނީ."

މި ހާދިސާއަށް ދައުލަތުގެ ފަރާތުން ވަނީ ވަރުގަދަ ރައްދެއް ދީފައެވެ. ކަރޫރު ރެލީގައި ސަލާމަތީ އުޞޫލުތަކާ ޚިލާފުވި ކަމަށް ބުނެ، ޓީވީކޭގެ ޖެނެރަލް ސެކްރެޓަރީ އެން އާނަންދު، ޖޮއިންޓް ޖެނެރަލް ސެކްރެޓަރީ ނިރްމަލް ކުމާރު އަދި ކަރޫރު ވެސްޓް ޑިސްޓްރިކްޓް ސެކްރެޓަރީ ވީޕީ މަތިޔަޒްހަގަންގެ މައްޗަށް ޤަސްތަކާނުލާ މީހަކު މެރުމުގެ ކުށުގެ ދަޢުވާ އުފުލާފައިވާކަމަށް ފުލުހުން ވަނީ ބުނެފައެވެ. ދައުލަތުން ވަނީ މި ހާދިސާގެ ޝަރީޢަތުގެ ތަޙްޤީޤެއް ކުރިއަށް ގެންދިއުމަށް، ހައިކޯޓުގެ ރިޓަޔާޑް ފަނޑިޔާރަކު ހެޑްކުރާ ކޮމިޓީއަކަށް އަންގާފައެވެ.