ނެތަންޔާހޫ އދ މަޖިލީހުގައި ބައިވެރިވުމަށް ދިއުމުން މަގުތައް ފުރާލައި ފަލަސްތީނަށް ތާއީދުކޮށް ގިނަ ބަޔަކު މުޒާހަރާކޮށްފި

ފަލަސްތީނުގެ ޣައްޒާގައި އިޒްރޭލުން ހިންގާ އަނިޔާވެރި ހަނގުރާމައަށް ދެކޮޅު ހެދުމުގެ ގޮތުން، އެތައްހާސް މުޒާހަރާކުރާ މީހުން މިދިޔަ ހުކުރު ދުވަހު ނިއުޔޯކް ސިޓީގެ މަގުތައް ފުރާލައިފިއެވެ. މި މުޒާހަރާ ކުރިއަށްދިޔައީ އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ، އދ. ގެ އާންމު މަޖިލީހުގައި ވާހަކަދެއްކުމަށް ނިއުޔޯކަށް ދިއުމުންނެވެ.

މުޒާހަރާގައި ބައިވެރިވި މީހުން ވަނީ ފަލަސްތީނުގެ ދިދަތައް ހިފައިގެން، ކުއްފިއްޔާ ބޭނުންކޮސް، "ފްރީ ފަލަސްތީން"، "ޣައްޒާ މީހުން ބަނޑަށް ޖެއްސުން ހުއްޓާލާ"، އަދި "އާރމްސް އެމްބާގޯ ނައު" (ހަތިޔާރު ފޯރުކޮށްދިނުން ހުއްޓާލާ) ފަދަ ޝިއާރުތައް ލިޔެފައިވާ ބެނާތައް ހިފައިގެންނެވެ.

މުޒާހަރާގެ ބައިވެރިން ފުރަތަމަ އެއްވެފައިވަނީ ޓައިމްސް ސްކުއަރއަށެވެ. އެއަށްފަހު އދ. ގެ މައި އޮފީސް ހުންނަ ސަރަހައްދަށް އައިސްފައިވެއެވެ. މި މުޒާހަރާގެ ތެރެއިން "ނެތަންޔާހޫ، ކަލޭ އަހަރުމެންނަށް ފިލައި ނުހުރެވޭނެ، ކަލޭގެ މައްޗަށް އަހަރުމެން ނަސްލުނައްތާލުމުގެ ދައުވާ އުފުލަން" މިފަދަ އަޑުތައް ގަދައަށް އިވެމުންދިޔައެވެ.

މި މުޒާހަރާ ކުރިއަށްދިޔަ ވަގުތަކީ ނެތަންޔާހޫ އދ. ގައި ވާހަކަދައްކަމުން ދިޔަ ވަގުތެވެ. އޭނާގެ ވާހަކައިގައި، ފަލަސްތީނުގެ ދައުލަތަކަށް ތާއީދުކުރާ ހުޅަނގުގެ ސަރުކާރުތަކަށް ވަނީ ވަރަށް ބޮޑަށް ފާޑުކިޔާފައެވެ. ނެތަންޔާހޫ ވާހަކަދައްކަވަން ފެށްޓެވުމާއެކު ގިނަ އަދަދެއްގެ މަންދޫބުން ވަނީ މަޖިލީހުން ނުކުމެ ވަޑައިގެންފައެވެ.

ޣައްޒާގެ ބަނޑުހައި ހޫނުކަމުގެ ހާލަތުގެ ފޮޓޯތަކާއި ރިޕޯޓުތަކުގެ ސަބަބުން އިޒްރޭލުގެ އޮޕަރޭޝަންތަކާ މެދު އާއްމުންގެ ނުރުހުން ވަނީ އިތުރުވެފައެވެ. މި އޮޕަރޭޝަންތަކުގެ ސަބަބުން އެތައްހާސް ބަޔަކު މަރުވެ، މުޅި އާބާދީ ވަނީ ހަލާކުކޮށްފައެވެ. ބައިނަލްއަގްވާމީ ހައްގުތަކުގެ ތަޖުރިބާކާރުން މި ހަނގުރާމަ ސިފަކޮށްފައިވަނީ ނަސްލުނައްތާލުމުގެ އަމަލެއްގެ ގޮތުގައެވެ. ނަމަވެސް އިޒްރޭލުން މި ދައުވާތައް ދޮގުކުރެއެވެ. އަދި 2023 ވަނަ އަހަރުގެ އޮކްޓޯބަރު މަހު ހަމާސްގެ ސަބަބުން 1،200 މީހުން މަރުވެ، 250 އަށްވުރެ ގިނަ މީހުން ރަހީނުކުރި ހަމަލާއަށް ރައްދުދިނުމުގެ ގޮތުން ހިންގާ އަމަލުތަކެއް ކަމަށް އިޒްރޭލުން ބުނެއެވެ.

އެމެރިކާގައި މި ހަނގުރާމަ ވަނީ ސިޔާސީ ގޮތުން ވަރަށް ބޮޑަށް ބަހުސްތައް އުފައްދާފައެވެ. ނެތަންޔާހޫގެ ގާތް އެކުވެރިއެއް ކަމަށްވާ ކުރީގެ ރައީސް ޑޮނަލްޑް ޓްރަމްޕް ވަނީ ފަލަސްތީނަށް ތާއީދުކުރާ މުޒާހަރާތައް ހުއްޓުވުމަށްޓަކައި މީހުން ހައްޔަރުކޮށް، ބިދޭސީ މުޒާހަރާކުރާ މީހުން އަނބުރާ ގައުމަށް ފޮނުވާލުމަށް އަމުރުކުރައްވާފައެވެ. ނިއުޔޯކް ސިޓީގައި ޣައްޒާ ހަނގުރާމަ ވަނީ މޭޔަރުކަމުގެ އިންތިހާބަށް ވެސް އަސަރުކޮށްފައެވެ. ކެންޑިޑޭޓް ޒޮހްރާން މަޢުމަދާނީ ނެތަންޔާހޫގެ ދަތުރުފުޅު ކުށްވެރިކުރެއްވިއިރު، މިހާރުގެ މޭޔަރު އެރިކް އެޑަމްސް ވިދާޅުވީ އިޒްރޭލުގެ ލީޑަރާ ބައްދަލުކުރެވުމަކީ ފަޚުރުވެރިކަމެއް ކަމަށެވެ.