ﷲ ތަޢާލާ ލޯބިފުޅުވާ ތިން ބާވަތެއްގެ މީހުން، ތިބާވެސް އެމީހުންގެ ތެރޭގައި ހިމެނިދާނެ!

ﷲ ތަޢާލާގެ ލޯބި ހޯދުމަކީ، އަޅުގަނޑުމެން ކޮންމެ މުސްލިމަކުވެސް އެދޭނެ ކަމެކެވެ. އެކަލާނގެ ލޯބި ލިބިގަތުމަށްޓަކައި، އެކަލާނގެ ލޯބިފުޅު ވަޑައިގަންނަވާ ސިފަތަކެއް އަޅުގަނޑުމެންގެ ކިބައިގައި ހުރުން މުހިންމެވެ. އަޅުގަނޑުމެން ބަލައިލާނީ، ﷲ ތަޢާލާ ލޯބިފުޅު ވަޑައިގަންނަވާ ތިން ބާވަތެއްގެ ބަޔަކަށެވެ. މި ސިފަތައް އަޅުގަނޑުމެންގެ ކިބައިގައި ހުރެއްޖެނަމަ، އެކަލާނގެ ލޯބިފުޅު އަޅުގަނޑުމެންނަށް ޔަޤީނުންވެސް ލިބިގެންދާނެއެވެ.

1. ތަނަވަސްކަމުގައްޔާއި ދަތިކަމުގައިވެސް މުދާ ހޭދަކުރާ މީހުން

އެންމެ ފުރަތަމައަށް، ﷲ ސުބުޙާނަހޫ ވަތަޢާލާ ލޯބިފުޅު ވަޑައިގަންނަވަނީ، ފަސޭހަ އަދި ފަހި ވަގުތުތަކުގައްޔާއި ދަތިކަމުގެ ވަގުތުތަކުގައިވެސް އެމީހުންގެ މުދާ ހޭދަކުރާ މީހުންނަށެވެ. އެބައިމީހުން ފަޤީރުވުމަށް ބިރެއް ނުގަނެއެވެ. އަދި ﷲ ގެ މަގުގައި ހޭދަކުރުން ނު ހުއްޓައެވެ. ﷲ ސުބުޙާނަހޫ ވަތަޢާލާ އެބައިމީހުންނަށް ކީރިތި ޤުރުއާނުގައި ވަޙީކުރައްވާފައިވަނީ "ހެޔޮކަމުން ފުރިގެންވާ ބަޔެއް" ކަމުގައެވެ. އެހެންކަމުން، އެކަލާނގެ ލޯބި ހޯދުމަށް ބޭނުންނަމަ، އަޅުގަނޑުމެންގެ މުދަލުން، ތަނަވަސްކަމުގައްޔާއި ދަތިކަމުގައިވެސް ﷲ ގެ މަގުގައި ހޭދަކުރުމަށް އަޒުމު ކަނޑައަޅާށެވެ.

2. ރުޅި މައިތިރިކުރާ މީހުން

ދެވަނައަށް، ﷲ ސުބުޙާނަހޫ ވަތަޢާލާ ލޯބިފުޅު ވަޑައިގަންނަވަނީ، އެބައިމީހުންނަށް ރުޅި އައިސް، ވަރަށް ބޮޑަށް ހިތްހަމަނުޖެހި، ކެތްނުވި ނަމަވެސް، އެ ރުޅި ގަދަވިޔަ ނުދީ، އެ ރުޅި މައިތިރިކޮށްލާ މީހުންނަށެވެ. އެބައިމީހުން އެ ރުޅި ދިރުވައިލައެވެ. އަދި އެ ރުޅީގެ ސަބަބުން ނޭދެވޭ އެއްވެސް ކަމެއް ނުހިންގައެވެ. ﷲ ސުބުޙާނަހޫ ވަތަޢާލާ މިފަދަ މީހުންނަކީ ވަރަށް ހެޔޮ ބަޔެއް ކަމަށް ބަޔާންކުރައްވައެވެ. އަދި އެބައިމީހުންނަށް ލޯބިފުޅުވެއެވެ. ވީމާ، ﷲ ގެ ލޯބި ހޯދުމަށް ބޭނުންނަމަ، ރުޅިގަދަވެ، ހިތްހަމަނުޖެހޭ ހާލަތެއް މެދުވެރިވެއްޖެނަމަ، ﷲ އަށްޓަކައި އެ ރުޅި މަޑުކޮށްލާށެވެ. އެކަލާނގެ އެކަމުގެ ބަދަލުގައި ތިބާދެކެ ލޯބިފުޅުވާނެއެވެ. އަދި އެކަމުގެ ރަޙުމަތުގެ ނިޝާންތައް އެ ދުވަސް ނިމުމުގެ ކުރިން ފެންނަން ފަށާނެއެވެ.

3. މީސްތަކުންނަށް މަޢާފުކުރާ މީހުން

ތިންވަނައަށް، ﷲ ސުބުޙާނަހޫ ވަތަޢާލާ ލޯބިފުޅު ވަޑައިގަންނަވަނީ، މީސްތަކުންނަށް މަޢާފުކުރާ މީހުންނަށެވެ. ހަނދާންކުރާށެވެ! އެ މަޢާފުކުރުމަކީ އެއް ފަހަރު، ދެ ފަހަރު، ތިން ފަހަރު އެއް ކަމަކަށް ދެވޭ މަޢާފެއް ކަމަށް ވެދާނެއެވެ. ނަމަވެސް، އެއަށްވުރެ ގިނަ ފަހަރު އެއް ކަމަކަށް މަޢާފު ކުރަން ޖެހިއްޖެނަމަ، ތިބާ އަމިއްލަ ނަފްސާ ސުވާލުކުރަން ޖެހެއެވެ:

 "މި މީހާއަށް ވަރަށް ގިނަފަހަރު މަޢާފު ކުރެވިއްޖެ ، މިކަމުގެ ސަބަބުން އެމީހާ ހިންގާ ނުބައި ކަންތަކަށް ބާރުއެޅެނީ ބާވައެވެ؟" ވީމާ، ދެ ތިން ފަހަރަށް ވުރެ ގިނައިން އެއް ކަމަކަށް މަޢާފުކުރަން ޖެހިއްޖެނަމަ، އެހެން ގޮތްތަކެއް ހޯދައި، އެކަމަށް އާ އުސޫލެއް ހިފަން ޖެހިދާނެއެވެ.

ރަސޫލުﷲ ޞައްލަﷲ ޢަލައިހި ވަސައްލަމަގެ ޙަޔާތްޕުޅަށް ބަލައިލައްވާށެވެ! އެކަލޭގެފާނަށް އަނިޔާކޮށް، އެތައް ކަމެއް ކުރިއެވެ. އެކަލޭގެފާނުގެ  ލޭފޮދު ބިމާ ހަމައަށް ފޭބި ނަމަވެސް، އެކަލޭގެފާނު އެއްވެސް އިރެއްގައި ހަމަލާއެއް ނުދެއްވައެވެ. ނަމަވެސް، އެއް ދުވަހަކު ކަންތައްތައް ހައްދުފަހަނަޅައި ދިޔުމުން، އެކަލޭގެފާނު އަސްކަރިއްޔާއެއް ތައްޔާރުކުރެއްވީ ހަނގުރާމަކުރެއްވުމަށެވެ.

ﷲ ސުބުޙާނަހޫ ވަތަޢާލާ އަޅުގަނޑުމެން އެންމެންނަށްވެސް މި ހެޔޮ ސިފަތަކުން ޒީނަތްތެރިކުރައްވާށި! އަދި ކީރިތި ރަސޫލާ ޞައްލަﷲ ޢަލައިހި ވަސައްލަމަގެ ދަރަޖަ މަތިވެރިކުރައްވާށި! އާމީން.