ދުބާއީ އިންޓަރނޭޝަނަލް އެއަރޕޯޓްގައި އާޓިފިޝަލް އިންޓެލިޖެންސް ތްރީޑީ ސްކޭނަރ ބަހައްޓައިފި

ދުނިޔޭގެ އެންމެ ބާރުބޮޑު އެއަރޕޯޓްތަކުގެ ތެރޭގައި ހިމެނޭ ދުބާއީ އިންޓަރނޭޝަނަލް އެއަރޕޯޓްގައި، އާޓިފިޝަލް އިންޓެލިޖެންސް ޓެކްނޮލޮޖީ ބޭނުންކޮށްގެން މަސައްކަތްކުރާ ޒަމާނީ 3D ސްކޭނަރުތައް ބަހައްޓަން ފަށައިފިއެވެ. މި ސްކޭނަރުތަކުގެ ސަބަބުން ސެކިއުރިޓީ ބަލައިފާސްކުރުން އިތުރަށް އަވަސްވެ، ދަތުރުވެރިންނަށް ފަސޭހަ ވެގެންދާނެކަމަށް އެއަރޕޯޓުން ހާމަކުރެއެވެ.

މި އައު ސްކޭނަރުތައް ބޭނުންކުރަން ފެށުމާއެކު ދަތުރުވެރިންނަށް އެމީހުންގެ ދަބަސްތަކުން ލެޕްޓޮޕް، ފެންފުޅި، ސެންޓް އަދި އެހެނިހެން ދިޔާތަކެތި ނަގާކަށް ނުޖެހޭނެއެވެ. ލަގެޖްތައް ހަމަ އެތައް ސިކުންތުކޮޅެއްގެ ތެރޭގައި ސްކޭންކުރެވޭނެކަމަށާއި، މީގެ ސަބަބުން ކިޔޫގައި މަޑުކުރަންޖެހޭ ވަގުތު ކުރުވެ، ދަތުރުފަތުރުގެ ތަޖުރިބާ އެއްކޮށް ރަނގަޅުވެގެންދާނެކަމަށް އެއަރޕޯޓްގެ އޮފިޝަލުން ވިދާޅުވެއެވެ.

އެއަރޕޯޓް އިދާރާއިން ބުނެފައިވަނީ، މި މަޝްރޫޢު 2026 ވަނަ އަހަރުގެ ނިޔަލަށް ނިމޭނެކަމަށެވެ. އަދި މި ޓެކްނޮލޮޖީގެ ސަބަބުން ދަތުރުފަތުރުތައް އިތުރަށް ފަސޭހަވެ، ދަތުރުވެރިންނަށް ބޮޑު ހިތްހަމަޖެހުމެއް ލިބިގެންދާނެކަމަށްވެސް އެއަރޕޯޓުން ވަރަށް ބޮޑަށް ޔަޤީންކުރެއެވެ.

ދުބާއީ އިންޓަރނޭޝަނަލް އެއަރޕޯޓަކީ އޭޝިއާ، ޔޫރަޕް އަދި އެފްރިކާއާ ދެމެދު  އޮތް ސްޓްރެޓީޖިކް ގޮތުން މުހިންމު ސަރަޙައްދެއްގައި ހުންނަ އެއަރޕޯޓެކެވެ. ފާއިތުވެދިޔަ ދިހަ އަހަރު ދުވަހުގެ ތެރޭގައި، ބައިނަލްއަޤުވާމީ ދަތުރުވެރިންނަށް އެންމެ ބާރުބޮޑު އެއަރޕޯޓްގެ މަޤާމް މި އެއަރޕޯޓުން ދަނީ ހޯދަމުންނެވެ.

2025 ވަނަ އަހަރުގެ ފުރަތަމަ ހަ މަސް ދުވަހަކީ ދުބާއީ އިންޓަރނޭޝަނަލް އެއަރޕޯޓުން މިހާތަނަށް ދުނިޔެއަށް ބާރުބޮޑު ފުރަތަމަ ހަ މަސް ދުވަހެވެ. މި މުއްދަތުގައި ޖުމްލަ 46 މިލިއަން ދަތުރުވެރިންނަށް ޚިދުމަތްދީފައިވާއިރު، މިއީ މިދިޔަ އަހަރާ އަޅާބަލާއިރު 2.3 އިންސައްތައިގެ ކުރިއެރުމެކެވެ. އީރާނާއި އިޒްރޭލްއާ ދެމެދު 12 ދުވަހަށް ދިގުދެމިގެންދިޔަ ހަނގުރާމައާއި، ފްލައިޓްތައް ކެންސަލްކޮށް ބައެއް ޤައުމުތަކުން އެމީހުންގެ ވައިގެ ސަރަޙައްދު ބަންދުކުރި ނަމަވެސް، މި ކުރިއެރުން ވަނީ ހޯދިފައެވެ.

2025 ވަނަ އަހަރުގެ ފުރަތަމަ ހަ މަސް ދުވަހު، ދުބާއީ އެއަރޕޯޓުން ކޮންމެ މަހަކު އެވްރެޖްކޮށް 7.7 މިލިއަން ދަތުރުވެރިންނަށް ޚިދުމަތްދީފައިވާއިރު، މިއީ ކޮންމެ ދުވަހަކު 254,000 ދަތުރުވެރިންނެވެ. 2024 ވަނަ އަހަރު ދުބާއީ އިންޓަރނޭޝަނަލް އެއަރޕޯޓުން ތާރީޚީ ގޮތުން އެންމެ ގިނަ އަހަރީ ދަތުރުވެރިންނަށް ޚިދުމަތްދީފައިވާއިރު، މި އަދަދު ވަނީ 92.3 މިލިއަނަށް އަރާފައެވެ. ދުބާއީއަށް އެންމެ ގިނައިން ދަތުރުކުރާ ޤައުމުތަކުގެ ތެރޭގައި އިންޑިއާ، ސައުދީ އަރަބިއްޔާ އަދި އިނގިރޭސިވިލާތް ހިމެނެއެވެ.